Одоо л блогоо ахиж бага, багаар сэргээж байгаа ч гэсэн 2009-2014 оны хооронд их л идэвхтэй бичдэг байлаа. Тухайн үед хүмүүс нэлээд ордог байсан асуулт самбар дээр Songodog гэсэн нэрээр ордог байв. 2009 онд Хятадад байсан болохоор хэрэглэдэг байсан сайтуудад орох гэж ядаргаа залхуураад л асуултад орно. Тэгж явсаар овоо удав. Хэзээ гэдгийг нь мэдэхгүй. Тэндээсээ салаалаад blog.banjig, blog.gogo орж юм бичдэг болов. Одоо байгаа Hanper нэрээ ашиглана.
2015 онд Монголд эргэж ирээд ажил төрөл гэж явсаар байтал блог ч мартагдав. Бичих ч балартав. Нэг мэдсэн блогууд бүгд алга болчхож бичсэн, хөтөлсөн нэг ч юм үлдээгүй байх юм. Эргээж сэргээх арга ч алга бололтой гэж бодож байтал саяхан санамсаргүй тохиолдлоор хуучны зөөврийн хард диск дээр асуулт самбарынхаа блогийг хуулаад авчхаж. Тэрийг хальт гүйлгэж харж явтал доор бичсэн мөрүүд байх юм. Тэгээд л би бодлоо. Бүхэл бүтэн 13н жил өнгөрөөд байхад би адилхан л тэнд тэнд сэтгэл алдраад л яваад байгаа юм байна даа гэж.
Хуучны зүйлс дурсамжтай бөгөөд бас сонин уншигдаж байна. Ахиад 13н жилийн дараа эдгээр зүйлс мөн л хачирхалтай санагдах биз ээ.
Тэгээд хуучны үгстэй хэлхээтэй жижиг шүлэг бас хавсаргав.
Цэг
Би яагаад хайлж урсаад
Бүтэхгүй дурлалд гуньж гутраад
Бороо орохоор санаа алдаад
Болзоо чамаас хүснэ вэ?
Чи яагаад ургаж дэлбээлээд
Чин сэтгэлээр өөрийгөө хайрлаад
Чөдөр ч үгүй бүжээд
Чимээ аниргүй амьдарна вэ?
_________________________________________
Hanper 01.07.2022
Хөөрхөн гэж чамайг хэлж чадахгүй нь
Уучлаарай
Татагдах сэтгэлээ ч татаж чадахгүй нь
Өршөөгөөрэй
Сэтгэлийг минь анзаарахгүй байгаад
Баярлалаа
Анзаарсан ч зугтахгүй байгаад
Гялайлаа
_________________________________________
Songodog 30.11.2009
( blog.banjig, blog.gogo эндээс юмнуудаа авах арга мэдэж байвал хэлж өгөөрэй. Одоо ч гэхдээ худлаа л байхдаа. Хэн тэрийг хадгалж суух билээ.)
Comments
Post a Comment