Зөв хүн

Зөв хүн тэнэг юмнаас болж үхдэг. Үүнийг нотлох гэж өөрөө хараагүй ч өрөөлөөс дуулснаа хүргэе. Худал гэж бүү бодоорой, зөв хүн хэлсэн юм шүү. Үхчихсэн л болохоос биш.

Зөв хүн гудамжаар явж байгаад дээрэмчинтэй тааран түрийвч ээ өгөхгүй хэмээн ноцолдоод хутгалуулан бурхан болжээ. Хөөрхий залуу зөв байсан ч нэгэнт үхсэн тул шүүх түүний талд шийдээд хэрэг байсангүй. Сүнс нь өрвөгөр дээрэмчнийг торон дотор нь шоолоод, уйлан замхрав.

Зөв баатар хулгайлагдсан гүнжийг аврах гээд луутай тулалдан нас эцэслэв. Тэнэг хүүхэн гэдгийг нь мэдсэн бол эрэлхэг баатар үхэхгүй ч байсан юм билүү. Аврах нь зөв байсан ч нэгэнт үхсэн тул ганц бие, зандан сүнс луу хөлөглөн өөр олон хүүхэн хулгайлахаас цаашгүй болжээ.

Зөв хүүхэн НОГООН гэрлээр, ЦАГААН шугамаар гарах гэж яваад яаруу жолоочид мөргүүлэн өөд болов. Өөдөө их л өндөр шидэгдсэн гэдэг. Зөв, буруу талаа харсан бол өөдөө өсгийт дээрээ догонцон, үдшийн болзоондоо яаран алхах байсан юм сан даа. Даанч тэнэг машины дугуйнд өртөж. Гүүгли ах ухаантай машин аа хурдан гаргаасай. Зөв хүн зөв зам гарахдаа үхмээргүй л байгаа юм сан даа.

Зөв гүнж баатар даган оргов. Балчиг намаг, балар ширэнгэ, балиар буудал бүгдийг үзээд өвчин хүртжээ. Эмчид очиж эм бичүүлээд буцаж явахдаа бадарчинтай тааран тарни заалгав. Гэртээ ирж ном уншуулаад одоо болсон гээд эмээ мартжээ. Зөв сүсэг бишрэлтэй ч салан задгай гүнж зулын хөрөг болжээ. Бурхан нас чинь болоогүй байсан юм даа хэмээн толгой сэгсрээд аргагүйн эрхэн хүлээн авлаа. Тэнэг юм даа хэмээн шүүрс алдана.

Зөв хүн цэрэгт элсэн эх орны өмнө хүлээсэн үүргээ үүрэхээр шийдэв. Хоосон шуудай байсныг нь мэдэлгүй худалч түшмэдийн үгэнд автан зэвсэг үүрээд өөртэйгөө адил зөв цэргийн өөдөөс буу шагайн гохоо дарлаа. Хоёр талаас хоёр зөв сум зөрөлдөн буруу газраа онож амийг нь авав. Сүнс болсон хоёр гар барьж эвлэрсэн ч амьд хоцорсон өөр нэг зөв хүн өшөө хорслыг нь авахаар өтөл түшмэлээс даалгавар авав.

Зөв хүн үнэнээр явбал үхэр тэргээр туулай гүйцнэ гэж ярих дуртай. Үнэн боловч үхсэн туулай л гүйцдэг юм шүү дээ. Өтөнд идэгдээд үлхийрчихсэн хүүр ямар л олигтой үнэртэв гэж баас үнэрлэчихсэн юм шиг ярвайх нь тодорхой. Худалч хүнийг харахаас зөв хүний ой гутна. Үнэн сайхан боловч, нэгэнт нөхөцсөн сүнсэнд ямар хамаа байх билээ? Тэгэвч ямар буруугаар явалтай биш хэмээн зөрж болох юм. Тэр нь ч тийм шүү! гэхдээ тэнэг юмнаас болж үхээд яахав дээ!

Зөв хүн өөр олон шалтгаанаас болж үхнэ. Тэр болгонд харуусах хэцүү ч тэнэг юмнаас болоход өөрийн эрхгүй уулга алдана. Ай хөөрхий, харамсалтай юм даа. Хүн, хүн дор бүрнээ нэгнээ хайрлаж ухаантай байхгүй бол болдоггүй амьдрал юм шүү дээ. Сүүлд нь дамжуулахад бүү эндүүрээрэй. Буруу хүн үхдэг ч тэнэг юмнаас болж биш тэнэгээсээ болж үхдэг юм шүү.

_________________________

Hanper.

Зөв байх нь яах вэ ээ! Тэнэг л байж болохгүй шүү :р